أخطاء قد تقع من الحاج في الاحرام ~

من طرف **منة حازم** الجمعة أغسطس 29, 2014 9:13 am

هنتكلم النهاردة باذن الله عن أول حاجة نبدأ بيها النسك ( يعني العمرة أو الحج ) وهيه النية يعني أنوي إني هأبدأ في أداء العمرة أو الحج

فالاحرام هو : نية الدخول في الحج أو العمرة أو فيهما معا

وعلى فكرة بخلاف النية على العبادات التانية كلها
النية في الاحرام بتكون جهرية
في الصلاة والصوم وغيرها بنوي بقلبي
لكن في الاحرام لازم النطق بالنية
فأقول لو ناوية عمرة أقول مثلا " اللهم لبيك عمرة "
عايزة أحج حج إفراد " اللهم لبيك حجا "
ولو حج قرآن " اللهم لبيك عمرة وحجا "

طيب ايه الأخطاء اللي ممكن يقع فيها الحجاج في الإحرام ؟

1- كتير من الحجاج وخصوصا اللي هيروحوا بالطيارة بيعدوا على الميقات ومش بينووا الاحرام ، وبيفضلوا من غير إحرام لغاية ما يوصلوا لجدة وده طبعا خطأ لأني لازم أحرم من الميقات الخاص بالمكان اللي جاية منه
يعني انا من مصر يبقى أحرم من الجحفة وهي مكان جنب رابغ
لكن حاليا بنحرم من رابغ
قال صلى الله عليه وسلم عن هذه المواقيت :" هن لهن ولمن أتى عليهن من غير أهلهن " .

وثبت في صحيح البخاري عن عمر بن الخطاب رضي الله عنه، أنه لما شكا إليه أهل العراق أن قرن المنازل التي وقتها رسول الله صلى الله عليه وسلم لأهل نجد جور عن طريقهم،يعني بعيدة عن الطريق، قال رضي الله عنه : انظروا إلى حذوها من طريقكم .

وده دليل على ان اللي بيعدي فوق الميقات بالطيارة عليه ان يحرم وهو في الطيارة
ومينفعش يستنى لغاية ما يوصل لجدة.

( وخلوا بالكم هروح على المدينة المنورة الأول مش هأحرم من الطيارة )

طيب أعالج المشكلة دي ازاي؟
أن يغتسل الحاج في بيته أو في المطار،ويلبس لبس الاحرام ويخلع ثيابه المعتادة،
فإذا حاذى الميقات أحرم منه،ويحدد نوع النسك اللي هيقوم بيه اذا كان عمرة او حج
فيقول مثلا " لبيك اللهم حجا "

طيب لو فاته الميقات يعمل ايه ؟
لو مقدرش يرجع للميقات ويحرم منه يبقى عليه فدية يذبحها في مكة، ويوزعها على الفقراء؛ لأنه ترك واجبا من الواجبات.

والعكس أيضا خطأ
يعني برضه مينفعش أحرم من مكان قبل الميقات .

2- في ناس بيعتقدوا اني بمجرد ما لبست ملابس الاحرام يبقى كده أحرمت

وده غير صحيح لازم مع لبس ملابس الاحرام وجود النية .

3-كمان في ناس بيفتكروا انه مادام لبس ملابس الاحرام لازم يفضل لابسها طول فترة الحج وما ينفعش يبدلها بثياب تانية
ويفضل قاعد بيها كام يوم

وده خطأ؛ فإن الإنسان المحرم يجوز له أن يغير ثياب الإحرام لسبب أو لغير سبب، إذا غيرها إلى شيء يجوز لبسه في الإحرام.
ومفيش فرق بين الرجال والنساء،
أقدر أغير ثياب الاحرام سواء كان بسبب زي مثلا ان ثياب الاحرام تنجست بنجاسة ومقدرش أشيلها من غير خلع ثياب الاحرام
أو اتسخ ولو بحاجة غير نجسة فساعتها الأحسن أغيره بثوب احرام تاني نظيف ،
أو حتى نفسي أغيره وخلاص وهو نظيف
زيادة نظافة مثلا
المهم أن هذا الاعتقاد غير صحيح، وهو أن يعتقد الحاج أنه إذا أحرم بثوب لا يجوز له خلعه حتى يحل من إحرامه.

4- ودي خاصة بالرجال
احنا عارفين ان الرجال يضطبعون بالإحرام والاضطباع يعني انهم يكشفوا كتفهم اليمين ويغطوا كتفهم الشمال
بعض الرجال بيفتكروا ان ده المفروض يتعمل بمجرد الاحرام
والصحيح ان ده مطلوب في الطواف فقط يعني مش قبل الطواف ولا في السعي .

5- الكثير مننا بيعتقد إني لازم أصلي ركعتين عند الاحرام ،
وده خطأ ، مفيش صلاة اسمها ركعتي الاحرام لأن ذلك لم يرد عن النبي صلى الله عليه وسلم .

فإذا اغتسل الإنسان ولبس ثياب الإحرام أحرم بدون صلاة،لكن لو كان الاحرام وقت صلاة فريضة مثلا ووقت الصلاة دخل أو قرب وقتها، فهنا الأحسن يكون إحرامه بعد الصلاة، أو مثلا هيصلي ركعتي الوضوء ، أما أن يتعمد صلاة معينة في الإحرام، فإن القول الراجح أنه ليس للإحرام صلاة تخصه.

6ـ احنا عارفين ان من السنن الاحرام قبل ما انوي الاحرام التطيب يعني يحط عطر( طبعا للرجال فقط مفيش كلام )
بس في رجال بيحطوه على ملابس الاحرام نفسها وده خطأ ، لأن ملابس الاحرام مينفعش نحط عليها عطر ، لكن السنة وضع الطيب على البدن نفسه.

طيب لو الرجل غلط وحطها على ملابس الاحرام يعمل ايه؟
لازم يغير ملابس الاحرام دي وميلبسهاش لغاية ما يغسلها ويزيل عنها العطر.

7 – الاعتقاد أن الغسل أو الوضوء عند الإحرام واجب ،لكن هو مستحب ، فلو أحرمت من غير وضوء ولا غسل فإحرامي صحيح .

8- ( حاجة خاصة بالرجال )وهيه لما بنقول ان الرجل المحرم لا يلبس المخيط ( الحاجة المتخيطة يعني )
ده مش معناه انه ميلبسش أي حاجة فيها خيط
لأه
المقصود الحاجة المتخيطة على قد الجسم زي البناطيل والقمصان والعبايات
لكن افرضوا مثلا لابس ملابس احرام وفيها رقعة متخيطة بخيط
يبقى مفيهاش حاجة .
ونلاقي بعضهم بيعتقدوا ان لبس الساعة، والنظارة، والحزام على الإزار، وغير ذلك، أو انهم يمسكوا شمسية علشان ما يغطوش راسهم بحاجة يبقى ،خطأ وده مش صحيح

9- اعتقاد أن المرأة الحائض لا يجوز لها الإحرام ،
يعني لما تكون حائض تقول خلاص مش هأحرم من الميقات وانتظر لما أطهر وأحرم من مكة
وده طبعا خطأ جدا لازم تحرم من الميقات وتعمل كل حاجة بيعملها الحاج
ماعدا بس الطواف حول الكعبة لازم تكون طاهرة عند الطواف .

10- بعض النساء بتعتقد أن للإحرام ثياباً خاصة ،لكن الصحيح أن المرأة يجوز لها أن تُحرم في ملابسها المعتادة ، لكنها تجتنب لبس النقاب والقفازين
و لها عند الحاجة أن تستر وجهها وكفيها بغير النقاب والقفازين زي مثلا انها تستر كفيها ‏بثوبها أو أن تستر وجهها بإسدال الخمار عليه
ومش شرط اللون الأبيض بالعكس يفضل أي لون غير اللون الأبيض علشان ميبقاش تشبه بالرجال لأن ملابس الاحرام للرجال بيضاء

11- الدخول في النسك ثم تركه دون إتمامه ،
يعني انوي الحج وأرجع في كلامي ومكملش الحج
لأن الله تعالى يقول: { وأتموا الحج والعمرة لله } ( البقرة 196 ) فمن أحرم بالحج أو العمرة فليس له الرجوع عن نسكه حتى يتمه .